Act 5 | BEF | STEP | Bo mone mino'ehina gi'a Ananiasi, to liha'amofihi gi'a Safaila. Ananiasiu bo mone'mofihi me'a noemito efahi aitogati li'ehina.

Acts 5

Ananiasiugo Safailaugo

1 Bo mone mino'ehina gi'a Ananiasi, to liha'amofihi gi'a Safaila. Ananiasiu bo mone'mofihi me'a noemito efahi aitogati li'ehina. 2 Ya huloto liha'a hiti lu kehelilete efahi luga'a etali'atiti fala nekite luga'a lite bite aposolo naga'i epi'aha'ina. 3 Ya ha'igo Pitau ma luto lu'ehina: Ananiasio, hena'mu Satau kai komopakagu tilago Sikalafu'i mi'i moloto faga luloto efahi luga'a li fala ki'ahane? 4 Koyapa'i ana me'i mina mefi'ahago, ya'mana kana'alo ya'mana me'i kai me'i mino'ehina yabe, to ana me'i bona'i noepito efahi litogomo ana efahi kai'naka lolo nohibe. Komopakagu henabe luto kehelito ya'ma suhi li huto hane? Kai lali'i limi'i memolo'ahata Hu'mamofihi mi'i moloto faga lu emi'ahata yabe. 5 Ananiasiu ana kaga keheliloto ana'asilo fililoto melugu limito ko'ehina. Ya higo enali ya hinamofihi kaga'a kehelina bona'i nelesa'ani gofa lu'ehina yabe. 6 To enali neheya kola bomagi ho tilete gukete li hekele telete le'mete bite keli hete'ahana yabe.

7 Ya hilete nesi'a mino yatama nehago Ananiasihi liha'a oto nonuga ti'ehina. To ai anana huto hu'ehina mekeheli'ehina yabe. 8 Ya higo Pitau lu emi'ehina: Lu nimibo, metitiloti efahi li'aha'ina ya'masi anasi ni'ifihe? Luto ligo, O'yo. Anasi ya li'ohu'ina yabe lu'ehina. 9 Ya ligo Pitau lu emi'ehina: Kai hiti bahaka hiti letali henabe lite lu kehelilete Sipi Bomofihi Sikalafu'a mi'i mele'aha'ibe? Bahaka akeli he ete'ahana bona'i yatai ma'asi kasito foiya nehanago enali kai'i ana hite kofite bilana'mu yabe. 10 Ya luto Pitau noligo ana'asilo fililoto gigusa'agu limito ko'ehina. Ya higo enali neheya kola bo lite bu gana ana a'i fili'ehigo bu gelete kofite bite baha'a keli he'ahana ya'ma beleha'alo keli hete'ahana yabe. 11 Asaga Hu'mamofitoga komopa'ani emi'ahananamagi to luga'a fato fato boana'magi hiti anana huto hu'ehinamofihi kaga'a keheli baga ilete enelesa'ani sipi lu'ehina yabe.

Babeyafana fato fato'i huto hu'ehina

12 Enali aposolo bomagi topa ho'ehinana babeyafana fato fato'i babu lite boana'magi folagaha'anigu li huto hi'ahana. Ya hago enali Hu'mamofitoga komopa'ani emite minelata hanamagi enali asaga yupahi utehi etehi Solomonihi Nosipenugu li nupa hilata hi'ahana yabe. 13 Enali mone luga'a Hu'mamofihi komopa'ani emi'ahanamagi koli hilete enali hiti ete li nupa mehi'ahana yabe. Ya'mu lite enali boana'magi enofokehi helete lusi kaga lu epele'ahana yabe. 14 Ya hana babu boana'i Sipi Bomofitoga komopa'ani emi'ahana nehanalo luga'a yuhufa babu lite ete ikele ikele hi'ahana yabe. 15 Ya nehago enali boana'magi enebesi'ehina bona'i ukogu enele'mo melelete kapolo fato fato ukogu ko epele'ahana yabe. To Pitau kapo moloto nobinogo ai meha'auba enebesise bona luga'amagihi enugufalo heleko melenogo ye kalabe lite yabe. 16 Yelusale hepa kegi'ati babu bona'i li nupa hite neete enebesise bona'anifi to foipa fele komopa'anigu minana hiti enele'mete ana bona'i ye ke su he'ahana yabe.

Enali aposolo bona'magihi ketana epi'ahana

17 To ya higo mono sipi kaba bo hiti to asaga bona'a hiti moneka mine'ahana to enali Satusi naga'magi hiti enali asaga'i enipakafa sipi he'ahana. Enali enegekesa kehelilete naga epilune lite lu keheli'ahana. 18 Enali aposolo bona'i enayato lite sipi naga nonugu enele'me mele'ahana yabe. 19 Ya hilago ana folugu'i Sipi Bomofihi agelo'auba naga gegisa li hokolo huloto aposolo bona'i enele'mo fegu toloto ma luto lu epi'ehina: 20 Lenali bite sipi mono nonugu ho tilete hetofa kapomu'i lite bona'i ka lamana'a lu epilo. 21 Aposolo bona'magi ka'a liyafa hilete folugu'i go'i yuhufa noligo sipi mono nonugu tilete hapi fite ka enelepite mine'ahana.

To sipi mono noto kaba bo yagi lalu'agihi kehe i nupa huloto kanisole bona'i hiti Yuta bona'magi olopa bo'ani hiti ete li gehesa hi'ahana. Ya hilete aposolo bona'i naga nonugati enele'mete alabe lite enoho lifi'ahana yabe. 22 Enoho lifi'ahana bona'magi naga noto nehetilete aposolo bona'i menehago sa hi'ahana. Ya hilete enali i behe hite bite kanisole bonatoga ma lite lu epi'ahana: 23 Lali naga noho kasito nehetito bu gota kasiha'a amuya melete loki helete kaba bo kasito gimi gi baga ite mine'ahabe. Ya huloto lali kafe sigito bu gota anagu bona'i memine'ahana afele su he'ahana. He'ahago bu goloto noone. 24 Ya lite lago enali sipi mono noto kaba bo hiti to enali sipi mono noto gimi bona'magi hiti aposolo bona'i hena hi'ahafi lite enegekesa yigi babu li'ahana. 25 Ya nehago bo mone nehetinauba ma luto lu epi'ehina: Kehelilo. Lenali naga nonugu enele'mo mele'ahana bomoya sipi mono nonugu ho tite nehite boana'i kaga neenelepibe. 26 Ya lite lago enali mono noto gimi bo yagi to luga'a gimi bo'a hiti enele'mo mege toloto buto aposolo bona'i sipi mono nonugati enele'mete e'ahana. Enali gimi bomagi aposolo bona'i osahi meepise enele'mete e'ahana yabe. Hena'mugope aposolo bomagi kaga'anilo kehelite nehana bona'magi enitaluga logo binogo efa kosatu'i legene ite loho fililafi lite enelesa'ani ligo yabe.

27 Enali gimi bomagi aposolo bona'i enele'mete ete kanisole bona'magi folagaha'anigu enele'mo ho ti'ahana. Ya hilago sipi mono noto bomagi kaba'aniuba ma luto enoloka ho'ehina: 28 Lenali boana'magitoga Yesuhi gi'a helete kaga lu meepilo luto ule'ale ka luto laga hu lepolo'ohuta yabe. Ya hu'ohuto bu galo, lenali kaga'tinimouba asaga Yelusale hepa'mogu bu baga i'ehibe. To lenali lali kaluga lilete Yesuhi enali ho fili'ahana yabe lilune'mu nehabe. 29 Ya lite lago Pitau yagi to luga'a aposolo bomagi kaga'anilo nona'a lu epi'ahana: Lali bona'magi kaga'anilo enemege'i memalaluta, Hu'mamofihi ai kaga'asigo mege'i malaluta'mu yabe. 30 Lenali Yesuhi malipu yafalo hu so kilete malipu yafalo ho fili'ahana lali tatatigi Hu'ma'anifu ai aku'i le'mo ho ti'ehina yabe. 31 Hu'mau le'moto tito yahi lamaga'aga molo'ehigo nohibe. Lali Isilaeli bona'magita kaba boti lehe'malube luto nohinago lali aitogago komopati emito aitoga binogo foipanati li he'mi letalina'mu yabe. 32 Asaga ya'mananamofihi kaga'a lu yege hose bo lali nohune, to Sikalafu'uba hiti ya'mana kaga lu yege nohabe. To ya'mana kaga keheli komopa'anigu malana boana'i Hu'mau Sikalafu'a enalitoga nomalabe.

33 Enali kanisole bona'magi aposolo bomagi lanaga kehelilete enitaluga logo bigo enoho fililune'mu hi'ahana. 34 Ya hago kanisole bona'magihi folagaha'aniguti bo mone ho ti'ehina. Ai gi'a Gamelieliu, Felosi bo yabe. Ai keya ka lu enelepilata bo, to enali asaga boana'magi ya nohinana'mu lite sipi fokehi lilata nehana, ai aposolo bona'i enoho lifigo fegutoga limi'ahana. 35 Ya nehago ai kanisole bona'i ma luto lu epi'ehina: Isilaeli naga'ise. Lenali ma bomagihi enugufalo li huto hilune'mu nehananalo lenali lenegekesa yigi fe lilete li huto hilo. 36 Lenali akeheli'ahabe. Kohe kanagu Teutasiu ho tiloto ma lu'ehina yabe: Nani amuya'ni hiti bo nohube. Ya luto ligo 400 bona'magi mege'i mele'ahana yabe. Ya higo gamani bouba ho fililago asaga bona'i mege'i mele'ahanamagi tili tele hite bula ola nehago ai'a lili'na'a li huto hu'ehina fenene hale hu'ehina. 37 Alihi ai megesalo gamani bouba boana'magi enigi lina kana'alo Yutasi Galili bouba ho tiloto luga'a boana'magihi kaga lu epigo ai mege'i ana suhi mele'ahana. Enali ho tilete mege'i melete gamani bona'i hiti luba hite enele'mo he'milune'mu hi'ahana. Ya hina ai ana huto fililago mege'i malana boana'i tili tele hi'ahana. 38 Ya hu'ehinagi nani yatai lu nolepube. Lenali ya'ma bomagihi koli'ani hiletetini he'mi epelenogo mineno. Ya'ma lili'namofihi hapa'a fa'mene bona'magi nelinogomo sibina huto fenene hilibe. 39 To Hu'mau ya'mana lili'nalo kaba hu'ehinogomo lenali laga mehi epalalana'mu yabe. To lenali Hu'mau hiti luba hite neminana bona'i lolo hi lalabe'mu lu nolepube. 40 Ya luto ligo kanisole bona'magi kaga'a mege'i mele'ahana. Ya hilete aposolo bona'i kehe ilete naga osatu enibi yigi'ahana. To enali amuya ka epekite aku aku'i Yesuhi gi'a helete kaga lu epimofa'na mehilo. Ya lite lu epilete aposolo bona'i he'mi epalago bi'ahana. 41 Aposolo bona'i enali kanisole bona nohi he'milete fegutoga limilete enegelo bi'ahana. Hena'mugope, Yesuhi gi'a lu yege hananalo Hu'mau enagabu foya kofilabe luto ekesa keheli'ehinalo yabe. 42 To asaga yupahi sipi mono nonugufi to enali'ani noha'anilugafi li nupa hite minete boana'i kaga lamana'a enelepite to Yesu Hu'mau le'mo ho ti'ehina bomofi kumu'i lu epiba lu epiba hite mine'ahana yabe.